15

بلاول بھٹو تھر میں 330 میگا واٹ بجلی گھر کا افتتاح کریں گے –


تھرپارکر: پاکستان پیپلز پارٹی کے چیئرمین بلاول بھٹو زرداری آج تھر میں 330 میگا واٹ بجلی گھر کا افتتاح کریں گے، سندھ حکومت تاحال تھر کول کی رائلٹی تھر پر خرچ کرنے کی پالیسی وضع نہ کر سکی۔

تفصیلات کے مطابق سندھ کے صحرائے تھر میں 330 میگا واٹ بجلی گھر کے افتتاح کے لیے پاکستان پیپلز پارٹی کے چیئرمین بلاول بھٹو زرداری تھر پہنچے۔ وزیر اعلیٰ سندھ مراد علی شاہ نے ان کا استقبال کیا۔

بلاول بھٹو کو کان کنی کی سائٹ سے ری سیٹلمنٹ پالیسی پر بریفنگ دی جارہی ہے۔ بلاول بھٹو کول ایریا کے مختلف حصوں پر کام کا معائنہ اور خطاب کریں گے۔

تاحال سندھ حکومت تھر کول کی رائلٹی تھر پر خرچ کرنے کی پالیسی وضع نہ کرسکی۔

خیال رہے کہ تھر سے حاصل شدہ کوئلے سے بجلی بنانے کا کام 2 سال قبل شروع کیا گیا تھا، گزشتہ ماہ 19 تاریخ سے تھرکول سے بجلی کی پیداوار شروع ہوگئی اور 330 میگا واٹ بجلی نیشنل گرڈ کو فراہم کردی گئی۔

تھر میں مدفون کوئلے کی مقدار 175 ارب ٹن ہے اور ان ذخائر میں موجود توانائی پاکستان کے گیس کے مجموعی ذخائر سے 68 گنا زیادہ ہے، اس کی مالیت اندازاً پچیس کھرب ڈالر سے زیادہ ہے۔

اس وقت پاکستان میں بجلی کی طلب 25 ہزار میگا واٹ ہے تاہم ٹرانسمیشن اور ڈسٹری بیوشن سسٹم کی خامیوں کی وجہ سے ایک وقت میں 21 ہزار میگا واٹ سے زیادہ بجلی کی ترسیل ممکن نہیں۔

ایک اندازے کے مطابق تھر میں موجود کوئلے کی مدد سے اگلے 200 سال تک ماہانہ ایک لاکھ میگا واٹ بجلی بنائی جا سکتی ہے۔

Comments

comments





Source link