14

راجن پور میں پولیس موبائل پر فائرنگ،2 اہلکاروں سمیت 5 افراد جاں بحق


راجن پور: پنجاب کے شہر راجن پور میں پولیس موبائل پر نامعلوم مسلح افراد کی فائرنگ کے نتیجے میں 2 پولیس اہلکاروں سمیت 5 افراد جاں بحق ہوگئے۔

تفصیلات کے مطابق واقعہ روجھان کےعلاقےعربی ٹبہ میں پیش آیا جہاں نامعلوم مسلح افراد نے پولیس موبائل کو نشانہ بنایا۔

پولیس موبائل معمول کے گشت پر تھی کہ اس دوران گھات لگائے مسلح افراد نے وین پر گولیاں برسا دیں جس کے نتیجے میں وین میں سوار 2 پولیس اہلکار موقع پر ہی جاں بحق ہوگئے جب کہ گولیوں کی زد میں آکر 3 بھی جان سے ہاتھ دھو بیٹھے۔

یہ بھی پڑھیں: ڈی جی خان ؛ پولیس مقابلے میں 2 اشتہاری ملزم ہلاک، اہلکار شہید

واقعے کی اطلاع ملنے پر پولیس کی بھاری نفری کو طلب کرلیا گیا، پولیس نے علاقے کو گھیرے میں لے کر ملزمان کی تلاش شروع کردی ہے۔

جائے وقوعہ سے ابتدائی شواہد اکٹھے کیے جارہے ہیں اور ریسکیو ٹیمیں امدادی کارروائیوں مکمل کرلی ہیں۔

ریسکیو 1122 کے اہلکاروں نے لاشوں کو ایمبولنس میں ڈال کر مقامی اسپتال منتقل کردیا ہے جہاں مقتولین کی شناخت کا عمل جاری ہے۔

قبل ازیں ڈیرہ غازی خان میں پولیس مقابلے میں 2 اشتہاری ملزم ہلاک جب کہ فائرنگ کے تبادلے میں ایک اہلکار شہید ہوگیا تھا۔

Comments

comments





Source link